大陸一天遊 : 順德逢簡水鄉黃媽媽私房菜

自從十年前去過台北嘅超值團, 都冇再去過呢D超值嘅購物團. 呢D團都預咗要去好多購物點. 雖然係平, 但係就好嘥時間, 絕對係唔啱我呢D人去(一定唔會買野嘅人). 但係我就未參加過XX徦期, 係好奇同價錢同要請一日徦嘅前提之下, 就參加咗(大佬呀, 團費$99+50小費, 唸咁多做乜??).

結果就當然同預計一樣, 係好嘥時間, 一日要坐成九個鐘頭旅遊巴(三個幾鍾頭由深圳去中山, 兩個幾鍾頭由中山去順德黃媽媽, 再搭三個幾鍾頭車由順德返羅湖. 如果你鍾意坐過山車都ok嘅, 因為架旅遊巴會成日係條公路到左穿右插, 都幾過癮), 過五關斬六將去食一餐. 真係去一次就夠哂, 叫做試過吓啦. 不過佢中午嗰餐都幾好食, 好食過好多團體餐. 而黃媽媽嗰餐更在一般水準之上. 唉, $148都唔夠食一餐lunch buffet, 所以只可以話呢個團唔係俾我呢D人參加, 我就寧願佢收貴D變半日團而唔駛去咁多購物點, 不過到時又可能唔夠客呢!

早上八點鐘開始係羅湖坐車, 十一點幾到咗中山嘅製藥基地(??). 第一個節目就係向我地sell田七. 佢地口中嘅田七係無所不能, 能醫百病, 絕無副作用. 見我地一場嚟到, 連本來留俾領導人嘅貨都會攞埋出嚟. 其實當睇緊警訊都ok嘅.